Иж шәһәренә татарлар кайдан һәм ни өчен килгәннәр? Мондагы Татар бистәсе һәм мөселман мәхәлләсе кайчан оешкан? Мәчетләрнең тарихы нидән гыйбарәт? Имамнары кемнәр булган? Китап белән танышкач, шушы сорауларга кыскача булса да җавап табарсыз. Бу китап Ижевскида татарларның бистә булып тупланып яши башлауларына 200 ел тулу, беренче мәчетнең төзелүенә 160 ел, ә икенчесенә 90 ел тулу уңае белән әзерләнде. Мәчетләрнең һәм муллаларның патша дәверендәге һәм Совет хакимлеге чорындагы катлаулы язмышлары турында тәфсилле мәгълүмат бирелде. Китапта Иж шәһәрендә элекке мәчетләрнең төзелешенә бәйле архив документлары, мәчетләрнең һәм имамнарның фоторәсемнәре урын алды. Совет хакимлеге чорында озак еллар мулла булып торган Галимҗан хәзрәтнең истәлекләре, мәхәллә халкына васыятьнамәсе һ.б. материаллар бирелде. Китапны язганда Ижевск, Казан, Уфа, Киров шәһәрләре архивларындагы документаль чыганаклар һәм фәнни хезмәтләр нигез итеп алынды.