Очеркист Василий Григорьевич Широбоков вордскиз 1919 арын Якшур-Бодья районысь Чекер гуртын. Якшур-Бодьяысь педагогической техникумез быдтыса ужаз «Удмурт коммуна», «Дась лу!» газетъёсын, книжной издательствоын, «Молот» журналын. 1952-55 аръёсы дышетскиз областной партийной школаын. 1954 арысен СССР-ысь писательёслэн Союззылэн членэз. Василий Григорьевич гожъяны кутскиз войналэсь азьло ик. Солэн очеркъёсыз но статьяосыз печатласькылӥзы «Советской Удмуртия» газетын но «Молот» журналын. Нош собере потӥзы нимаз книгаосын: «Бадӟым сюрес» - 1950 арын но «Мынам республикае» - 1960 арын. Выль книгае пыртэмын берло гожтэм очеркъёсыз но пичиесь веросъёсыз. Отын автор вера котырысьтымы умоесь но сюлмоесь адямиос сярысь, возьматэ асьмелэсь чебер инкуазьмес.