Очеркист Василий Григорьевич Широбоков, та книгалэн авторез, удмурт лыдӟисьлы тодмо луиз война бере аръёсы «Советской Удмуртия» газетын но «Молот» журналын потылэм очеркъёсызъя. Соин ӵош ик В. Широбоков - умой переводчик. Со удмурт кылэ берыктӥз А. Чеховлэсь веросъёссэ, Н. Островскийлэсь «Кызьы андан кыдаз» романзэ, М. Шолоховлэсь «Адямилэн улон сюресэз» нимо вероссэ но мукет. Удмурт книжной издательство В. Широбоковлэсь очеркъёссэ нимаз книгаен нырысьсэ поттӥз 1950 арын «Бадӟым сюрес» нимо сборникен. «Мынам республикае» сборниказ пыро В. Широбоковлэн берло гожтэм очеркъёсыз. Отын автор возьматэ республикамылэсь будэмзэ но азинскемзэ, отысь умоесь, ужез яратӥсь, тыршись адямиосты. Али со ас вордскем палъёсыз сярысь веросъёс гожъян бордын ужа.