Та книгалэсь авторзэ, Анна Григорьевна Колесниковаез тросэз тодэ на, луоз, сцена вылын синмаськымон шудэмезъя. Учкисьёслы вунонтэм кылизы солэн шудэм геройёсыз. Тани со И. Гавриловлэн «Кезьыт ошмес» пьесаысьтыз Натӥлэсь рользэ, нош «Геройёс» пьесаын ик пичи пилэсь - Микилэсь рользэ шудэ. Синмаськымон шудӥз Колесникова Н. Островскийлэн «Гроза» драмаысьтыз Катериналэсь но рользэ. Анна Григорьевна - А. Горькийлэн «Егор Булычёв» пьесаысьтыз Александралэсь-а рользэ шудӥз, М. Петровлэн «Зӥбет зурка» пьесаысьтыз Онисьлэсь-а рользэ яке Гольдонилэн «Кык господаослэн слугаоссы» пьесаысьтыз чебер но маскара Смеральдиналэсь-а рользэ шудӥз - котькуд ролез бордын вань сюлэмзэ поныса тыршылӥз. 1940 арын Колесниковалы Удмурт АССР-лэн заслуженной артисткаез дано ним сётэмын. Малпаськом, лыдӟисьёс но мылысь-кыдысь лыдӟозы талантливой артисткалэсь «Мон шудо» повестьсэ. Та повестез автобиографической шуыны уг луы. Со возьматэ удмурт ныллэсь театральной искусствое вуэмзэ, бадӟым профессиональной артистка луэмзэ. Анна Григорьевна Колесникова вордскиз 1916 арын азьло Алнаш районысь Ромашкино гуртын. 1947 арын творчествоезлэн самой сяськаяськон дыръяз со быриз. Та повестьсэ йылпумъяса ӧз вутты.