Кизнерской производственной колхозно-совхозной управлениысь «Рассвет» колхозысь механизаторъёс Пётр Колчин но Павел Марков ортчем арын 200 гектар кукуруза будэтӥзы, котькуд гектарысь 480 центнер вож сиён люказы. Механизаторъёс юн сюлмасько асьсэлэсь колхоззэс азинтон сярысь. Соос ялан малпасько, кызьы но мар чотын луоз туэ нянь будэтонэз, пудо вордонысь продуктъёс вузанэз йылэтыны, кызьы механизаторъёс юрттыны кулэ та дано ужпумез ӟечгес быдэстон понна. Краснодарской крайысь Усть-Лабинской производственной управлениысь сельской хозяйствоын ужасьёслэн кичӧлтонэнызы тодматскыса, соос кыл сёто ӵошен туэ 250 гектар кукуруза, 30 гектар сахар кушман но 5 гектар бобы будэтыны, котькуд гектарысь ӧжытсэ 93 центнер кормовой единица пудо сиён люканы. Та брошюраын П. Колчин вера аслаз звеноезлэн ужан опытэз сярысь.