Гажано лыдӟись, шуом, огпол ӵукна усьтэм укноетӥ комнатаяд фотоаппарат лобӟыса пыриз. Шуом, со шунды палтӥ пыриз, комнатаетӥд котырскиз, одӥг маке шоры мертаськиз, затвореныз «чильк» кариз но берлань лобӟиз. Потыкуз кеськиз: «Али ик плёнкаез проявить каро но карточкаосме ысто». Яке мукет учыр. Одӥг шулдыр нуналэ радиодэ включить карид но дикторлэсь ивортэмзэ кылӥд: «Кылзэлэ! Кылзэлэ! Толэзе нырысетӥ рейсэ потэ СССР-ысь космической корабльлзн экипажез». Яке газетэз берыктӥд но лыдӟиськод: «Оренбургской областьысь нянь будэтӥсьёс июньлэн ӝыныяз куризы вить зоро нунал, вить пӧсь нунал но ньыль сӥялэс нунал. Тӧл ляб мед луоз, температура кызь градусозь шуныт мед улоз». Веранэз ӧвӧл, ваньмыз со али фантастика на, вуоно улон сярысь малпан гинэ. Бен кызьы тодод! Оло трос ик дыр ортчыны уз вуы, малпанмес улон ортчоз. Тӥни со сярысь ик асьмелэн, советской адямиослэн, малпанмес улонын быдэстэммы сярысь, странаямы семилетний планлэн ӵуказе улонэ эшшо одӥг вамыш лэсьтыны юрттэмез сярысь верало И. Дубровицкий но В. Орлов асьсэлэн «З3 юанлы 33 ответ» нимо книгаязы.