Пичи Пурга районысь "Зарни шеп" фольклор ансамблез, шаерамы гинэ ӧвӧл, ӟеч тодо Башкортостанысь, Татарстанысь, Пермь областьысь удмуртъёс. Со сяна, пӧртэм конкурсъёсы пыриськылыса, со вуылӥз ини Сыктывкаре, Сургутэ, Саранске, Омске; берло кык аръёс куспын коллективлэсь быгатонлыкъёссэ адӟизы Финляндиысь но Венгриысь учкисьёс. 1990 арын "Зарни шеп"-лы "Калык ансамбль" ним сётэмын, нош 1994 арын Вылӥ Кенешлэн Президиумезлэн грамотаеныз пусъемын. Та ансамблез 1979 арын кылдытӥз но соин кивалтэ Ф. М. Тубылова. Федосья Михайловна ӵемысь ачиз ик кырӟан чуръёс но гожъя.