Литературалэн чеберлыко дуннеяз тӥледыз нош ик паймымон пумиськонъёс возьмало. Тӥ тодматскоды выль авторъёсын но соослэн геройёсынызы, соосын ӵош шумпотоды но шугъяськоды, йыркуръяськоды но синмаськоды, куддыръя, оло, соослэсь адӟем но кароды. Котькуд чеберлыко произведенилэсь шорсюлэмзэ геройёс пӧрмыто. Соин ик тӥ синйылтыны кулэ, маин соос ог-огзылэсь висъясъко, маин герӟаны луэ аспӧртэмлыко сямъёссэс, кудъёсыз геройёс авторлы матын, нош кудъёсыз - ӧвӧл. Тодоно, соослэн кыӵе пӧртэмлыкъёссы литературалэн дӥньёсыз (родъёсыз) но жанръёсыз бордысь пото. Чаклано, кызьы писатель, кылобразъёсты кутыса, геройзэ вунонтэм, син шоры пуксьымон, улэп кадь суреданы быгатэ. Та юанъёслы валэктон утчаны юрттозы Тодосчи но солэн покчи эшез - 7-тӥ классын дышетскись Айно нимо нылаш. Озьыен, дась-а тӥ выль сюрес вылэ потыны? Соку азьлань!