Та книгае пыртэмын кык выжыкыл но кык повесть. Выжыкылъёсын тӥ пумиськоды кышкасьтэм Микиен, Койыкен но Дыдыкен. Ас калыксэ курадӟонлэсь, кайгу куректонлэсь мозмытон понна, Мики нюръяське инкуазьлэн урод кужымъёсыныз, лек кышномуртэн — Ягидаен но ворме соосты («Чагыр сяська»). Сьӧд кужымъёслы пумит нюръяськонын озьы ик кыдало Койыкен Дыдык но («Тыпы но Ошмес»). Калыклэн шудэз понна соос улонзэс но уг жаляло. Интересно ортчыто дырзэс гужем каникулъёсы повестьысь пионеръёс но школьникъёс: соос шулдыр шутэтско, ужало колхозын, быгатэмзыя нюръясько калык ваньбурез тус-тас карисьёслы пумит, шуге-леке но вуыло со нюръяськонын... Отрицательной геройёс пыр (школьникъёс Лёша, Миша но Федя) автор возьматэ урод сямъёслэсь адямиез умойтэм сюрес вылэ вуттэмзэс. Гожтӥз та книгаез Н. В. Васильев. Та солэн кыкетӥез нылпиослы гожтэм книгаез. Нырысез — «Петро но Митро» — потӥз 1967 арын. Со сяна, Н. Васильевлэн потӥзы ни веросъёсын «Адями сюлэм», «Кин тон, атай?» книгаосыз, кылбуръёсын «Сюрес вожын» но «Шундыё нуналэ» сборникъёсыз. Ужа Н. Васильев «Советской Удмуртия» газетлэн редакцияз.