А. Леонтьевлэн выль книгаезлэн нимыз ик ӧте кыл дуннее куное. Быдэсак со удмурт кылмылэсь узырлыксэ но пӧртэмлыксэ лыдэ басьтыса гожтэмын. Котькуд кылбурлэн аслаз тунсыко пуштросэз. Соос тодмато пудо-животъёслэн, пӧйшуръёслэн, тылобурдоослэн сямъёсынызы, возьмато инкуазьмылэсь узырлыксэ, ӟеч сямъёслы дышето, вордскем шаермес, удмурт кылмес гажан мылкыд пыӵато. Книга сӥземын покчи но шоро-куспо арлыдо дышетскись пиналъёслы. Кылбуръёсты озьы ик мыло-кыдо лыдӟозы мӧйыос но. Кылбуръёс бадӟым юрттэт сётозы внеклассной уж нуисьёслы но удмурт кыллы дышетӥсьёслы. Соосты уже кутыны луоз, трос значениен кылъёсты, валче но нимазы гожтӥськись сложной кылъёсты, синонимъёсты валэктыку. Та кылбуръёс вылын омонимъёс сярысь паськытгес валан сётоно, малы ке шуоно, нылпиос ӵемысь пример чотын верало пӧртэм вераськон люкет луись кылъёсты. Озьыен, дыртэ, дыртэ лыдӟыны, кыл дуннее вуылыны.