Та чебер книгалэн авторъёсыз унолэсь но уно. Соос пӧлын - мумыос-бубыос, нуныез кӧкыын веттаса пукись песянайёс. Нош сборникысь данаксэ произведениосты малпазы асьсэос пиналъёс. Нуны веттан гуръёс, вазиськонъёс, лыдъяськонъёс, исаськонъёс, ӝог веранъёс, шудонъёс - макем пӧртэмесь соос, котькудӥзлэн аслаз чеберез, аспӧртэмлыко крезьгурез. Сыӵе со нылпи фольклорлэн дуннеез - паймымон, вуюись кадь турлы-турлы буёло, чингыли кадь жингырес. Ма, та произведениос дас ар ӵоже гинэ ӧз кылдэ. Асьме нылпиос вашкала дырысен ини ярато кырӟаны-вераны, пӧртэм шудонъёсты шудыны. Озьы тӥни, выжыысь выжые, ымысь ыме вераса, арысь аре чебермыса но узырмыса, нылпи фольклор произведениос асьме дырозь вуизы. Малпаськомы, та книга бадӟым юрттэт сётоз нылпи садикъёсысь воспитательёслы но, начальной школаысь дышетскисьёслы но. Таӵе синмаськымон кузьымлы уката ик шумпотозы пиналъёс.