Удмурт республикаысь культура удысын заслуженной ужась Гай Сабитович Сабитов вордскиз 1915 арын Татариысь Кукмор районысь Выль Канисар гуртын удмурт крестьян семьяын. Нырысетӥ кылбуръёсыз потылыны кутскизы 1938 арын «Молот» журналын но «Удмурт коммуна» газетын. 1953 арын лыдӟисьёс кие вуиз поэтлэн нырысетӥ «Кылбуръёс но кырзанъёс» сборникез. 1960 арын удмурт кылэ берыктӥз татар поэтлэсь Муса Ӟалильлэсь кылбуръёссэ. Мукет татар поэтэн но тодматӥз Г. Сабитов удмурт лыдӟисьёсты - 1963 арын удмурт кылын потӥзы Г. Тукайлэн нылпиослы гожтэм кылбуръёсыз. Нылпиослы ик сӥзиз Сабитов «Куноын» поэмазэ но (1967 ар). Удмурт композиторьёсын ӵош поэт трос гинэ умоесь кырӟанъёс гожъяз ини. «Кырӟанъёсы тыныд» сборникез (1962 ар) быдэсак сямен кырӟанъёслэсь люкамын. «Арган кырӟа» книгаын но соос адӟиськымон инты басьто. Кырӟанъёс сяна, та сборнике пыртэмын выль кылбуръёс, соос пӧлын М. Покчи-Петровлы сӥзем сонетъёслэсь венок.