Вениамин Ившин литератураез яратӥсьёслы ӟеч тодмо луэ арлыдоос но покчи нылпиос понна пӧртэм аръёсы поттэм книгаосыныз. Солэн кылбуръёсыз берыктэмын ӟуч, эстон, украин, чуваш, пор, коми, авар кылъёсы; куд-огъёсыз калыке вӧлмизы, кырӟан луыса. Выль книгаысьтыз кылбуръёс азьло но али вакытъёс сярысь малпаськонэн, шумпотонэн но шугъяськонэн тырмемын. В. Ившин кепыратэк пыре удмурт калыклэн вашкала улон-вылоназ, асьмелы кужым сётӥсь дуно выжы ошмесъёсыз утча отысь. Туала адямилэсь бугырес мылкыдъёссэ-а возьматэ, кык лулъёс куспын гинэ сяськаям яратон сярысь-а вера кылбурчи - сюлэмыз ӟечлы гинэ усьтэмын. Солэн кылбуран куараез лачмыт, сайкыт, шунтӥсь но оскытӥсь.