Историе пумен кыдёке кылё усто но аспӧртэмлыко кылбурчилэн Александр Дмитриевич Вотяковлэн (1928-1985) произведениосыз. Тросээ соос потылэмын кылем даурлэн шор вадесаз газетъёсын но журналъёсын гинэ, нош книгаоссэ шедьтыны шуг ни библиотекаосысь но. Нырысез – "Нырысетӥ вамыш" кылбуръёсын бичетэз потӥз 1958-тӥ арын, берпуметӥез – 1977-тӥ арын гинэ секыт висьыны кутскемез бере. Кылбурчилэн вордскем Подшивал гуртаз улэ-вылэ но ужа кырӟанэз яратӥсь калык. Вань асьсэлэн кырӟанъя но эктонъя “Марӟан” ансамбльзы. Утчало но кырӟало гуртозылэсь кылдытэмъёссэ но. Кылбурчизэс гажало, котькуд юбилейзэ пусйыло. Жаль, троссэ чуръёссэ уг тодо ни, соин ик тодэмзы потэ. Творчествозэ выльысь эскеремзы, калык доры вуттэмзы потэ. Александр Вотяковлэсь произведениоссэ нимаз книгаен поттыны куро трос лыдӟисьёс. А. Д. Вотяков югыт дуннелэсь люкиськиз ини 1985-тӥ арын, нош пӧртэм композиторъёсын ӵош кылдытэм кырӟанъёсыз ноку уз вунэ. Нокызьы медаз вунэ! 2008-тӥ арын 17-тӥ феврале солы 80 арес тырмысал ини.