1948 арын «Советской Удмуртия» газетын потӥз «Вало возь» нимо кылбур. Со вал Можга педучилищеын дышетскись Даниил Яшинлэн нырысетӥез печате потэм произведениез. Даниил Александрович Яшин вордскиз Можга районысь Вуж Каксялан. Начальной школаын дышетскиз аслаз гуртаз. Собере Вуж Юбера семилетней школаез йылпумъяса пыриз Можга педучилищее. 1948-1952 аръёсы дышетскиз Удмурт педагогической институтлэн кылъя но литературая факультетаз. Институтэз быдтэм бераз ужаны ыстэмын вал Глазовысь Короленко нимо педагогической институтлэн удмурт кылъя но литературая кафедраяз. Али со ужа Ижевскысь Удмурт пединститутын. 1959 арын Д. Яшин поттӥз «Ортчисьтэм егит дыр» кылбур сборник. Поэзия удысын сяна, автор ужа на удмурт фольклорез люкан но дышетон бордын. 1962 арын со поттӥз «Удмурт фольклор» нимо книга. «Эшъёс ке вань...» - поэтлэн кыкетӥ сборникез.