Та пичигес сборникын ас мылкыдзэс, ас малпанзэс верало нылкышно кылбурчиос. Соос пӧлысь студенткаос Дина Волкова, Евгения Ситникова нырысь вамышъёссэс лэсьто. Нош Алевтина Аникиналэн, Роза Яшиналэн, Людмила Широбоковалэн куараоссы ӵемгес кылӥськылӥзы ини. Соослэн нимъёссы адскыло «Молот» журналын но республиканской газетъёсын. «Ныл сюлэм» шуэмын сборникмы. Зэм но, тросэз кылбуръёс ныл сюлмын, шуныт кылъёсын гожтэмын. Поэтической детальёс, образъёс пыр авторъёс возьматыны тыршо адямилэсь улон сярысь малпаськемзэ, инкуазьлэсь чеберзэ. Егитъёс сярысь гожъяку, соослэн яратэмзы сярысь но вератэк уг луы. Та тема вӧзтӥ ортчыллямтэ поэтессаосмы но. Чылкыт яратон, сюлэм куректон, мӧзмон — ваньмыз со сайкыт гожтэмын.