Удмурт литератураез тодӥсьёслы Пётр Захаровлэн нимыз выль ӧвӧл ни, лыдӟисьёс сое тодо 1987 арысен «Кенеш» журналын, «Советской Удмуртия» газетын печатласькем кылбуръёсызъя. Но солэн нимыз калыклы тодмо луиз 1990 арысен «Инвожо» журналын ужаны кутскемез бере публицистической ужъёсызъя, мукет кылъёсысь берыктэмъёсызъя но аслаз кылбур бичетъёсыныз. 1993 арын солэн «Эбга» трагедиез СССР-ысь драматургъёслэн семинаразы нырысетӥ инты басьтӥз. Удмурт театр та пьесаен Финляндие но ӧтчамын вал. Вылӥ верам ужъёсыз понна, озьы ик «Инӟарекъян» но «Одӥг пол гинэ» коллективной сборникъёсы пыриськеменыз Петр Захаров 1997 арын Россиысь писательёслэн Союзазы кутэмын. 2000 арын «Удмуртия» книгапоттонни солэсь «Эбга» нимо книгазэ печатлаз. Таяз сборнике авторлэн дас вить ар ӵоже гожъям кылбуръёсыз, поэмаосыз, берыктэм ужъёсыз пыризы.