1950-1954 аръёсы Николай Васильевич Васильев дышетскиз Удмурт государственной пединститутлэн физико-математической факультетаз. Татын соку умой ужаз удмурт литературно-творческой кружок. Та кружок трос юрттӥз Николай Васильевлы но. Институтын дышетскон аръёсы куд-ог кылбуръёсыз потазы газетъёсын, «Кизили» альманахын. Институтэз йылпумъямез бере, Н. Васильев Алнаш средней школаын дышетэ, удмурт литературной кружокен кивалтэ. Егит дышетӥсь ачиз но кылбуръёс гожъямысь уг дугды, одӥг-ог веросъёс но гожъя. 1960 арысен — журналист. Та аре ик веросъёсын «Адями сюлэм» нимо сборникез потӥз. Со сяна, нимаз книгаосын потазы куд-ог очеркъёсыз. «Шундыё нуналэ» Васильевлэн кыкетӥез поэтической сборникез луэ. Нырысез потӥз 1957 арын. Солэн нимыз - "Сюрес вожын".