Та книга - Филипп Григорьевич Кедровлэн произведениосыныз нырысез бадӟым сборник. Писательлэн куинь кылбур сборникез потэмын вал ини: «Сяськаяськись улон» (1937), «Кылбуръёс» (1939), «Быръем произведениос» (1946). Удмурт но ӟуч кылын нимаз книгаен печатламын «Катя» повестез (1954-1956 аръёсы). Огез но со книгаос писательлэсь ваньзэ умоесь произведениоссэ тырмыт уг огазеяло. «Быръем произведениослэсь» выль изданизэс дасяку люкамын на Ф. Кедровлэн пӧртэм сборникъёсын, «Удмурт коммуна», «Советской Удмуртия» газетъёсын, «Кылбурет удысын», «Молот» журналъёсын печатлам кылбуръёсыз сяна, лыдӟисьлы тодмотэмъёсыз но. Соос архивысь («Комсомолец Петров», «Пӧсь лыктӥз Ондӥлы») но поэтлэн фронтысь гожтэтъёсысьтыз басьтэмын («Выль арен, яратон семьяе», «Мусоелы»). Кылбуръёс книгае темаосъя интыямын. Озьы вал автор улэп дыръя потэм сборникъёсын.